KUNINGAN - Penyiar senior Radio Kuningan FM, Wa Jono, nami panjangna Sujono, kawartoskeun tilar ti dunya ngantunkeun urang sadaya, Dinten Saptu (7/6/2025) sonten. Bewara ngantunkeunana sesepuh penyiar radio ieu dilereskeun ku pihak Diskominfo Kabupaten Kuningan. Dina wawaran ngalangkungan media sosial Instagram resmina, Diskominfo Kabupaten Kuningan nuliskeun yén Wa Jono parantos ngantunkeun urang sadayana, mulih ka jati mulang ka asal, nalika anjeunna dirawat di RSUD 45. "Rengrengan Kulawargi Dinas Komunikasi dan Informatika Kabupaten Kuningan ngiring bela sungkawa ku pupusna wargi urang sadayana Sujono, Direktur LPPL Kabupaten Kuningan," kitu wawaran nu ditulis dina media sosial Diskominfo Kabupaten Kuningan, Saptu (7/6). Almarhum Wa Jono seueur dipikawanoh ku masarakat Kuningan lantaran suantenna sering ngajomantara unggal dinten ti saluran radio Kuningan FM. Anjeunna oge kapeto janten PLT Direktur LPPL (Lembaga Penyiaran Publik Lokal) Kuningan. Pikeun masyarakat Kuningan anu sok nongton Karnaval Hari Jadi Kuningan anu sok diayakeun unggal taun, pasti apal ka sosok almarhum. Kusabab Wa Jono rutin ngeusi janten panata calagara dina agenda karnaval eta. Ciri khas humor Wa Jono dina mawakeun acara sering nyieun sakabeh nu nongton kahibur.Numutkeun informasi, Wa Jono tos lami ngagaduhan panyawat gula atanapi diabetes melitus. Almarhum kantos lami teu damang dugi ka sababaraha sasih teu tiasa ilubiung dina padamelan sadidinten. Sababaraha dinten ieu Wa Jono dirawat di RSUD 45 Kuningan, mung dina dinten Saptu ieu, Almarhum dipundut ku Nu Maha Kawasa, ngantunkeun urang sadayana.Almarhum Wa Jono kantos oge janten Anggota DPRD Kabupatén Kuningan ti Fraksi PDIP dina periode 1999-2004. https://kuninganreligi.com/susanto-berkurban-sapi-limosin-hampir-satu-ton-prioritaskan-warga-tak-mampu/ Anjeunna mangrupikeun anggota DPRD anu vokal merjuangkeun aspirasi masyarakat Kuningan khususna nu aya di Dapil 5. Hiji anu dipikasono ti Wa Jono, anjeunna barahan soméah ka sasaha wae anu pendak. Malahan tara asa-asa, padumukan Wa Jono mah sok molongo kanggo saha waé anu silaturahmi. Teu padu kitu waé, Wa Jono sering nyugemakeun saha waé anu datang ka padumukanna ku suguhan."Menu anu khas sok disiapkeun Wa Jono mun ka rompokna téh nyaéta Acar Guramé nganggo sambel jahé. Duh meni sono Wa Jon. Mugia Husnul Khotimah, diangken ku Nu Kawasa ditempatkeun dina tempat anu mulya mungguh AnjeunNa," Pileuleuyan Wa Jon!(NARS)
